Armëmbajtje pa leje, vjedhje me dhunë dhe transportim të emigrantëve të paligjshëm, arrestohen 3 persona

Janë vënë në pranga nga policia e Vlorës mbrëmjen e djeshme tre persona të cilët akuzohen për vepra të ndryshme penale, përkatësisht për armëmbajtje pa leje, vjedhje me dhunë dhe transportimin të emigrantëve që synonin të kalonin ilegalisht kufirin drejtnë Greqisë.

Sipas raportimeve të policisë, në pranga kanë rënë shtetasi D. M., 26 vjeç, të cilit pas ndalimit nga policia gjatë kontrollit iu gjet 1 armë zjarri. Në pranga ka rënë shtetasi H. Z., 31 vjeç, i cili pasi dhunoi punonjësit e OSHEE-së, i mori makinën e kompanisë dhe gjatë ndalimit iu gjet edhe një mjet prerës thikë. Ndërkohë, është vënë dhe në pranga personi i tretë, shtetasi M. Q., 30 vjeç, i cili u kap pasi duke transportuar me automjetin tip “Volkswagen” 5 shtetas (4 nga Shqipëria, 1 nga Kosova), të cilët synonin të kalonin ilegalisht në Greqi.

Njoftimi i plotë i policisë:

Finalizohen në 24 orë, 3 operacione kundër: armëmbajtjes pa leje, vjedhjes me dhunë dhe transportimit të shtetasve që synojnë të kalojnë ilegalisht, në Greqi.

Arrestohen 3 shtetas, prej të cilëve: njëri lëvizte me taksi, i armatosur me pistoletë; tjetri vodhi 1 automjet të OShEE-së, pasi dhunoi punonjësin që e drejtonte, ndërsa shtetasi i tretë transportonte 5 shtetas nga Shqipëria dhe Kosova, që kishin pengesa për lëvizjen në zonën “Schengen”.

Sekuestrohen arma e zjarri (pistoletë) me krehrin dhe me fishekët, 1 armë e ftohtë (thikë) dhe automjeti me të cilin transportoheshin shtetasit.

-Shërbimet e Stacionit të Policisë Dhërmi, në bashkëpunim me shërbimet e Forcës së Posaçme “Shqiponja”, finalizuan operacionin e koduar “Pasagjeri”, në kuadër të të cilit u arrestua në flagrancë shtetasi D. M., 26 vjeç, banues në fshatin Babrru, Tiranë. Gjatë kontrollit fizik, kryer pas ndalimit të taksisë me të cilën lëvizte, 26-vjeçarit iu gjet 1 armë zjarri (pistoletë) me krehër dhe me fishekë, që posedohej pa leje.

-Shërbimet e Komisariatit të Policisë Delvinë, në bashkëpunim me shërbimet e Komisariatit të Policisë Sarandë dhe me shërbimet e Forcës Kombëtare të Sigurisë, Njësia Fier, finalizuan operacionin e koduar “Thirrja”, në kuadër të të cilit u arrestua shtetasi H. Z., 31 vjeç, banues në fshatin Vanë. Ai u lokalizua dhe u kap pak orë pas kallëzimit të një punonjësi të OSHEE-së, se një shtetas e kishte dhunuar për t’i vjedhur automjetin e kompanisë, i cili u gjet dhe iu kthye subjektit, në zbatim në urdhrit të prokurorit. Më tej, gjatë kontrollit fizik, shtetasit H. Z. iu gjet 1 armë e ftohtë (thikë).

-Shërbimet e Komisariatit të Policisë Kufitare Sarandë finalizuan operacionin e koduar “Barriera”, në kuadër të të cilit u arrestua në flagrancë, në afërsi të PKK Qafë Botë, shtetasi M. Q., 30 vjeç, banues në Belsh, pasi transportonte me automjeti tip “Volkswagen”, 5 shtetas (4 nga Shqipëria, 1 nga Kosova), të cilët synonin të kalonin ilegalisht, në Greqi, sepse kishin pengesa për lëvizjen në zonën “Schengen”.

Materialet procedurale iu referuan prokurorive, për veprime të mëtejshme.