Pasojat e COVID-19 në ekonomi, Malaj: Qeveria të ulet sa më parë me biznesin. Xhepa: Kriza do të jetë si në 2008

Në një debat të realizuar përmes lidhjeve paralele ‘live’ në studion e Ilva Now, ekspertët e ekonomisë, Arben Malaj dhe Selami Xhepa ndanë qëndrimet e tyre sa i takon pasojave që do të ketë në ekonominë shqiptare kjo periudhë pauze gjatë të cilës vendi ndodhet në karantinë nga COVID-19.

Z. Malaj vlerësoi si të duhura masat e marra nga qeveria në shërbim të shëndetit të qytetarëve, ndërsa shtoi se skema sociale është po kaq e nevojsme sa edhe urgjenca për të sëmurët. Ai propozoi që qeveria të ulej sa më parë me biznesin për të frenuar së pari rënien e mëtejshme ekonomike.

“Masat e marra drastike në kushtet e shëndetit janë ato që duhet, është sfidë e shqiptarëve që përballen nga dy fatkeqësi në pak kohë, tërmeti  dhe virusi. Lidhur me masat ekonomike, shoh shumë propozime të cilat i mbështes.

Shumë qeveri të botës premtuan skema sociale, që janë po aq të nevojshme siç është skema e urgjencës për të sëmurët. Si ta ndalim ekonominë të bjerë më poshtë, dhe për këtë rëndësi ka që palët të ulen e të shikojnë opsionet. Nuk duhet vonuar ulja me biznesin për të frenuar rënien e mëtejshme”, tha z. Malaj.

Ndërkohë, z. Xhepa vlerësoi masat e marra nga qeveria, edhe pse sipas tij në sektorin e shëndetësisë duhet të ishin marrë masa edhe më të fuqishme përmes politikave të fuqishme për të mbështetur spitalet me mjetet e nevojshme.

Sipas tij, efektet e kësaj ngjarjeje janë më të rënda se ato të krizë financiare të 2008-s.

“Kjo është një krizë që përfshin edhe sektorin financiar, edhe atë privat. Janë më shumë se 7 trilionë dollarë humbje nga kjo krizë. Sado pak, edhe ne ndikohemi nga këto shqetësime. Sot bëhet fjalë për të shpëtuar  industrinë prodhuese. Duhen marrë në konsideratë edhe propozimet e opozitës, pasi kanë të bëjnë masa për të përballuar këtë periudhë 2-3 mujore”, tha ai.