Masakra e Srebrenicës, Vjosa Osmani: Akte të tilla duhet të marrin gjykimin e drejtësisë

Në 26-vjetorin e masakrës së Srebrenicës, Presidentja e Kosovës, Vjosa Osmani u shpreh se aktet e tilla barbare duhet të marrin gjykimin e drejtësisë dhe të historisë.

“Sot dhimbjen e nënave të Srebrenicës e ndajmë bashkërisht! Mbetjet mortore të 19-të vrarëve atëkohë sot do të kenë adresën e përhershme. Një 16-vjeçar do të jetë në mesin e atyre që do të varrosen sot, 26-vjet pas vrasjes!  Akte të tilla barbare duhet të marrin gjykimin e drejtësisë, por edhe të historisë”, ka deklaruar znj. Osmani.

Presidentja thekson se askush më mirë se Kosova nuk e njeh dhimbjen e Srebrenicës

“Srebrenica është kujtesa jonë e freskët dhe leksion se krimet e padënuara përbëjnë bazë që ato të përsëriten. Askush më mirë se Kosova nuk e njeh dhimbjen e Srebrenicës. Reçaku, Meja, Pokleku, Prekazi, si dhe shumë masakra të tjera në pjesë të ndryshme të Kosovës, janë pjesë e të njëjtës dhimbje e të njëjtit përjetim. Kuvendi i Republikës së Kosovës, ditë më parë miratoi Rezolutën për gjenocidin në Srebrenicë, me të cilën Kosova e dënon gjenocidin e organizuar dhe të kryer nga forcat gjenocidale të regjimit serb të Millosheviqit”, thotë ajo.

Më 11 korrik të vitit 1995, mbi 8,000 burra dhe djem boshnjakë u vranë , pasi forcat serbe të Bosnjës pushtuan Srebrenicën.

Masakra e Srebrenicës është episodi i vetëm i luftës në Bosnjë që përcaktohet si një gjenocid, përfshirë nga dy gjykata të Kombeve të Bashkuara.

LEXONI GJITHASHTU:

• Kurti fton vendet e rajonit për të nxjerrë para drejtësisë përgjegjësit e gjenocidit të Srebenicës
• 26 vite nga masakra e Srebrenicës, eshtrat e 19 viktimave varrosen në Qendrën Përkujtimore