Drejtori i Zyrës për Kosovën në Serbi kërkon leje të vizitojë komunën e Zveçanit

Drejtori i Zyrës për Kosovën në qeverinë e Serbisë, Petar Petkoviç pritet të vizitojë për dy ditë Kosovën.

Ministria e Drejtësisë thotë se Petkoviç ka bërë kërkesë për lejimin e vizitës në Kosovë, bazuar në marrëveshjen e nënshkruar në vitin 2014 në Bruksel.

“Ministria e Punëve të Jashtme dhe Diasporës (MPJD) ka miratuar kërkesën për lejim të vizitës në Republikën e Kosovës për zyrtarin serb Petar Petkoviç, për datat 12-13 korrik 2021”, tha Ministria e Drejtësisë për Kosova Press.

Ministria e Drejtësisë thotë se z. Petkoviç është i detyruar të respektojë protokollin dhe agjendën, si dhe të tregojë kujdes me deklaratat politike, gjuhën nxitëse dhe retorikën kundër shtetit të Kosovës.

Sipas ministrisë, mosrespektimi i protokollit do të shoqërohet me refuzim të kërkesave të radhës.

“Çdo tejkalim i këtyre rregullave, do të ndikoj që MPJD-ja të refuzojë kërkesat e radhës nga Serbia”, shton ministria.

Petar Petkoviç do të marrë pjesë në një akademi të organizuar në “Shtëpinë e Kulturës”, me rastin e shënimit të 30-vjetorit të themelimit të Komunës së Zveçanit.

Në vitin 2018, Policia e Kosovës arrestoi me forcë ish-drejtuesin e Zyrës për Kosovën në qeverinë serbe, Marko Gjuriç, i cili hyri ilegalisht duke shpërfillur institucionet e shtetit.

LEXONI GJITHASHTU

• Kosova i miraton lejen, Marko Gjuriç pritet të vizitojë një kishë në Veri
• ”Ofendim dhe provokim” ministria e Jashtme refuzon kërkesën e presidentit serb Vuçiç për të vizituar Kosovën
• Kryetarja e OSBE-së: Ka efekte pozitive në dialogun Kosovë-Serbi