Irak, mbi 50 viktima nga një zjarr në spitalin për pacientët me COVID-19

Të paktën 58 persona kanë humbur jetën pas një zjarri në një prej spitaleve në jug të Irakut ku trajtoheshin pacientë me COVID-19.

Autoritetet shëndetësore gjithashtu konfirmuan se mbi 100 persona kanë mbetur të lënduar në spitalin që ishte hapur vetëm tre muaj më parë.

Sipas disa zyrtarëve, zjarri ra si pasojë e një qarku të shkurtër elektrik, por nuk mbetet jashtë dhe pista e shpërthimit të një bombole oksigjeni.

Kryeministri Mustafa al-Kadhimi dha urdhër për pezullimin si dhe arrestimin e drejtorit rajonal të shëndetësisë, si dhe drejtorit të spitalit.

Ky është zjarri i dytë i këtyre përmasave në një prej spitaleve të Irakut. Në prill, 82 pacientë humbën jetën pas shpërthimit të një prej bombolave të oksigjenit.

Incidenti nxori në pah neglizhencën dhe keqmenaxhimin sistematik të autoriteteve spitalore.

Aktualisht, Iraku është në mesin e një vale të re infektimesh, ku vetëm javën e shkuar u regjistruan 9 mijë raste të reja.

Pas dekadash në luftë e sanksionesh të njëpasnjëshme, sektori i shëndetësisë së Irakut ka hasur vështirësi të shumta në përballimin e virusit. Mbi 17 mijë persona kanë humbur jetën që prej fillimit të pandemisë.

LEXONI GJITHASHTU:

• Indi, zjarr në një spital për pacientë me COVID-19, raportohet për 13 viktima
• Zbulohet rasti i parë i mutacionit indian të COVID në RMV, pacienti u kthye nga Iraku
• Papa Françesku përfundon udhëtimin në veriun e Irakut të shkatërruar nga lufta