Autobusët e parë elektrikë, Veliaj: Heqim disa linja që abuzojnë me shërbimin urban

Njëzetë autobusë elektrikë do të futen në qarkullim brenda muajit gusht në linjën e re të Unazës në Tiranë.

“Aktualisht ne kemi 24 mjete hibride që vijnë brenda viti 2021. Bëhet fjalë për mjete të cilat në zonat urbane, pra deri në shpejtësinë 25-30 km funksionojnë me energji elektrike dhe vetëm pasi rritet shpejtësia futet në funksion motori me gaz”, u shpreh kryebashkiaku Erion Veliaj.

Prezantimi i autobusëve elektrik nga kreu i Bashkisë Tiranë vjen disa ditë pas interesimit të Euronews Albania se përse autobusët elektrik nuk kishin hyrë ende në qarkullim. Për herë të parë në Tiranë autobusët elektrikë u testuan në vitin 2017, por ky projekt u la pezull për katër vite. Tashmë autobusët hibridë do përdoren në 66 stacione.

“Përtej Unazës ekzistuese zgjerohemi duke përfshirë dhe rrugën ‘Dritan Hoxha’, duke shkuar tek Shqiponja, duke vazhduar nga Pallati me Shigjeta, pra e gjithë zona e Astirit. E gjithë gjatësia e Lanës deri tek ‘Brryli’, pastaj rruga Kongresi i Manastirit dhe do të shkojmë deri në shërbim të spitaleve”, tha Veliaj.

Një javë më parë Euronews Albania solli në vëmendje problematikat që ka transporti publik në kryeqytet, ku qytetarët ankoheshin për kushtet dhe pritjen gjatë në stacione. Në lidhje me këto shqetësime të vazhdueshme, Veliaj tha se disa linja në kryeqytet do të hiqen nga qarkullimi.

“Janë kapur linja që falsifikojnë bileta, që falsifikojnë abonenë, janë kapur linja që i shesin ato në treg të zi dhe spekulojnë me mënyrën se si funksionon aboneja e përgjithshme. Do kemi disa linja që nuk do të vazhdojnë më funksionimin në qytetin e Tiranës, ose prej ndotjes së jashtëzakonshme që kanë prodhuar, ose prej faktit se në mënyrë sistematike mashtrojnë publikun dhe Bashkinë e Tiranës, si me abonet, si me biletat, si me shërbimin”, tha kreu i Bashkisë së Tiranës.

LEXONI GJITHASHTU:

• Autobusë elektrikë në rrugë, reduktohet ndotja, projekti pilot nis me Tiranën, Vlorën dhe Durrësin
• Moska bëhet ‘e gjelbër’, plan për pajisjen e transportit publik me autobusë elektrikë