Familjet e policëve të rënë në krye të detyrës do ndihmohen financiarisht nga shteti

21 policët e rënë në krye të detyrës u nderuan të martën me zbulimin e pllakës përkujtimore “Heronjtë e Kosovës” afër objektit të Drejtorisë së Përgjithshme të Policisë së Kosovës në Prishtinë. 

Në mesin e emrave ishte edhe ai i policit Enver Zymberi, i cili 10 vjet më parë u vra gjatë një aksioni në pjesën veriore të Kosovës. 

Kryeministri i Kosovës, Albin Kurti vlerësoi policinë e rënë duke thënë se “dha jetën në mbrojtje të sovranitetit dhe mbrojtje të vendit tonë”.

Ai tha se familjet e policëve të rënë në krye të detyrës do të mbështeten financiarisht nga shteti.

Kreu i Kuvendit Glauk Konjufca i krahasoi policët e rënë me dëshmorët e luftës duke shtuar se Policia e Kosovës është institucioni më i rëndësishëm i cili kujdeset për vendin dhe sigurinë publike.

Drejtuesi i Forcave të Rendit në Kosovë, Samedin Mehmeti, tha se “deri tani kanë rënë 21 zyrtarë policorë, të cilët u shndërruar në model si duhet të mbrohet vendi”.