Rreth 1.300 të vdekur nga tërmeti në Haiti

Bilanci i viktimave të tërmetit të fuqishëm që goditi Haitin ditën e shtunë ka shkuar në rreth 1 mijë e 300 të vdekur.

Skuadrat e shpëtimit po nxitojnë për të gjetur të mbijetuar, përpara se stuhia tropikale “Grace” të godasë ishullin.

Ajo pritet të mbërrijë në vend mbrëmjen e së hënës dhe do të karakterizohet nga shira të dendura.

“Kemi regjistruar gjithashtu 2.800 të plagosur. Këtu përfshihen ata që arritën të shkonin në qendrat spitalore, por jo ata që nuk janë gjetur ende, ose janë të bllokuar, duke qenë se kërkimet vazhdojnë”,  u shpreh Jerry Chandler, shef i Agjencisë së Mbrojtjes Civile.

Tërmeti goditi pjesën jug-perëndimore të vendit të varfër të Karaibeve, duke shembur qytete të tëra dhe duke shkaktuar rrëshqitje toke.

Të mbijetuarit në disa zona u detyruan të qëndrojnë rrugëve ose të strehohen në stadiume, ndërkohë që spitalet u mbushën me personat e lënduar.

Tërmeti erdhi në një kohë teksa vendi po përballet me pandeminë e coronavirusit, vrasjen e presidentit dhe një valë dhune të bandave.

LEXONI GJITHASHTU:

• Mbi 300 viktima nga tërmeti në Haiti, rrafshohen 950 shtëpi
• Haiti goditet nga tërmeti 7.2 ballë, dyshohet për viktima
• Thellohet misteri me të dyshuarin kryesor për vrasjen e presidentit të Haitit