Ndahet nga jeta bateristi i ‘Rolling Stones’

Charlie Watts, bateristi legjendar i ‘Rolling Stones’ ka ndërruar jetë në moshën 80-vjeçare. Agjenti i tij, Bernard Doherty tha të martën se Watts “vdiq paqësisht në një spital në Londër ditën e sotme i rrethuar nga familja e tij”.

“Charlie ishte një bashkëshort, baba dhe gjysh i dashur dhe gjithashtu si anëtar i ‘Rolling Stones’, një nga bateristët më të mëdhenj të brezit të tij”, tha Doherty.

Një zëdhënës i artistit kishte njoftuar në fillim të gushtit se ai nuk do të merrte pjesë në turneun e grupit në SHBA, të planifikuar për në vjeshtë, për arsye mjekësore.

“Charlie i është nënshtruar një operacioni të suksesshëm, por mjekët e tij mendojnë se ai duhet të pushojë”, tha ai në atë kohë.

Watts kishte qenë anëtar i ‘Rolling Stones’ që nga viti 1963. Së bashku me këngëtarin Mick Jagger dhe kitaristin Keith Richards, ai ishte një nga anëtarët më të vjetër të grupit të famshëm rock, i cili ka bashkëpunuar me yje të muzikës si Mick Taylor, Ronnie Wood dhe Bill Wyman.