“U kthyem në pikën zero”, drejtori i klinikës në Prishtinë: Urgjent masa për pandeminë

Që prej fillimit të pandemisë, klinika e Mjekësisë Sportive në Prishtinë nuk ka qenë asnjëherë kaq e tejmbushur.

E destinuar për trajtimin e pacientëve me COVID-19, tashmë klinika nuk ka më kapacitete trajtuese. Për drejtorin Artan Ahemti një fluks i tillë nuk ishte parashikuar.

Drejtori i Klinikës së Mjekësisë Sportive, Artan Ahmeti flet për KosovaPress, për gjendjen në këtë klinikë dhe kapacitetet që kanë në dispozicion për trajtimin e këtyre rasteve.

“Realisht ndoshta edhe nën zero sepse një rritje kaq të shpejtë nuk e kemi pasur asnjëherë në asnjë valë, numër kaq të madh të hospitalizuarve nuk kemi pasur në asnjë valë deri tani. Është një numër shumë i madh dhe kërkesat për hospitalizim janë shumë të mëdha. Në klinikën e Mjekësisë Sportive për tri ditë janë mbushur të gjitha kapacitetet”, tha ai.

Nga pacientët e shtruar gjatë ditëve të fundit, është arritur në përfundimin, se kjo valë pandemie ka prekur më shumë moshat e reja.

“Mosha e re është më e prekur, mosha mesatare e përbën shumicën e pacientëve të hospitalizuar”, u shpreh ai.

Sipas drejtorit të klinikës Ahmeti, ajo që vihet re është se ndër qytetarët që po trajtohen në ambientet e Mjekësisë Sportive, pjesa më e madhe janë të pavaksinuar.

Mjeku Ahmeti u ka bërë thirrje të gjithë qytetarëve që të respektojnë masat anti-COVID, por sipas tij, Ministria e Shëndetësisë duhet të vendosë për masa të reja, meqenëse sistemi shëndetësor është i brishtë.

LEXONI GJITHASHTU:

• Kosova raporton 16 të vdekur nga COVID-19
• Kosova shtyn nisjen e vitit të ri shkollor, ndalohet lëvizja pas orës 22:00