Bizneset në Kosovë kundërshtojnë masat e reja anti-COVID

Rritja e numrit te vdekjeve dhe infektimeve nga virusi COVID-19, bëri që qeveria e Kosovës të ashpërsoje masat anti-COVID.

Këto masa prekin edhe ekonominë e vendit. Për ketë arsye, Oda Ekonomike, ajo e Hotelerisë e Turizmit dhe shoqatat e gastronomisë nuk po pajtohen me masat e reja.

Sipas kreut të OEK, Berat Rukiqi, qeveria duhet të fokusohet në procesin e vaksinimit masiv të qytetarëve.

Se këto masa do t’i dëmtojnë bizneset, e thotë edhe drejtuesi i Odës së Hotelerisë dhe Turizmit dhe ai i Shoqatës së Gastronomeve të Kosovës.

Ata pajtohen për respektimin e tyre vetëm nëse shteti do i mbështesë financiarisht.

“Vetë fakti që jemi në këtë gjendje, ne do si do në një farë forme duhet përkrahur diçka që zbutë këtë situatë. Normal, që më së shumti neve na ‘dhemb’, pasi preket shumë ky sektor”, tha Hysen Sogojeva, kryetar i Odës së Hotelerisë dhe Turizmit.

Pavarësisht ankesave të bizneseve, mjekët thonë se gjendja është shumë e rëndë.

“Një rritje kaq të shpejtë nuk e kemi pasur asnjëherë në asnjë valë, ndërkaq numër kaq të madh të të shtruarve në spitale nuk e kemi pasur në asnjë valë deri tash. Në Klinikën e Mjekësisë Sportive për tri ditë janë mbushur të gjitha kapacitete”, tha Artan Ahmeti, drejtori i Klinikës së Mjekësisë Sportive.

Vetëm në dy ditët e fundit në Kosovë kanë ndodhur 34 vdekje. Për këtë arsye u vendos për shtrëngim të masave.

LEXONI GJITHASHTU:

• “U kthyem në pikën zero”, drejtori i klinikës në Prishtinë: Urgjent masa për pandeminë
• Kosova raporton 16 të vdekur nga COVID-19
• Qeveria e Kosovës pritet të ashpërsojë masat anti-COVID, shkak rritja e infektimeve