Theu rregullat, Kosova ndalon Petar Petkoviç të hyjë në territorin e saj

Shefit të ashtuquajturës Zyra Serbe për Kosovën, Petar Petkoviç nuk i është aprovuar vizita dy ditore (3-4 shtator) në Kosovë.

Ministria e Punëve të Jashtme dhe Diasporës (MPJD) në Kosovë thotë se Petkoviç në tri vizitat e fundit në Kosovë ka përdorur gjuhë urrejtjeje dhe nxitëse.

Institucioni në fjalë thotë se rasti flagrant, në të cilin Petkoviç ka thyer rregullat ka qenë pjesëmarrja e tij në inaugurimin e “universitetit” në Mitrovicë të Veriut.

“Në kundërshtim me obligimin e marrë dhe zotimin që do të përmbahet nga deklaratat provokuese dhe nxitëse të urrejtjes, ai në vazhdimësi në tri vizitat e fundit haptazi ka përdorur gjuhë të urrejtjes dhe nxitëse, duke kulmuar në vizitën e fundit në inaugurimin e të ashtuquajturit “universitetet” në Mitrovicë të Veriut. Për më tepër, ai nuk e ka paralajmëruar këtë aktivitet tek pala kosovare”, thuhet në përgjigjen e MPJD-së për KosovaPress.

Vizita i është ndaluar vetëm Petkoviçit, ndërsa pjesës tjetër të delegacionit i është miratuar hyrja.

“Bazuar në këtë, Qeveria e Republikës së Kosovës nuk i ka lejuar hyrjen në Kosovë për datat 3-4 shtator 2021 atij, teksa për pjesën tjetër të delegacionit ka miratuar hyrjen”, potencohet në përgjigjen e MJPD-së.

Këtë të premte nga zyra e të ashtuquajturës zyra Serbe në Kosovë thanë se veprim i Kosovës tregon mosgatishmërinë e saj për të normalizuar marrëdhëniet me Serbinë.

“Ky është ndalimi i tretë i Prishtinës për drejtorin e Zyrës për Kosovën dhe negociatorit kryesor serb në dialogun teknik, dhe kjo vjen përpara vazhdimit të dialogut midis Beogradit dhe Prishtinës javën e ardhshme në Bruksel, gjë që tregon gjithashtu edhe mosgatishmërinë e Prishtinës për normalizimi i marrëdhënieve me Beogradin”, thuhet në reagim.