A bashkëpunon Euralius me Komisionin e Venecias? Komisioneri i Zgjerimit i përgjigjet Ilva Tares

Në një intervistë të gjatë që analizoi me detaje hallkat e procesit të zgjerimit të Bashkimit Europian, shpresat dhe kritikat nga disa vende, komisioneri i Zgjerimit Oliver Varhelyi theksoi se ekziston fryma e bashkëpunimit midis vendeve dhe institucioneve për të mbikëqyrur sa më mirë dhe në mënyrë të paanshme reformat në Shqipëri.

Pyetur specifikisht për punën e projektit të asistencës teknike për forcimin e reformës në drejtësi, financuar nga Bashkimi Europian, Euralius, Varhelyi tha se koordinimi ekziston.

“Për shumë vite BE-ja ka qenë e pranishme këtu duke investuar nëpërmjet pranisë por dhe fondeve bujare. Euralius, është i pranishëm për të 5-tin mision radhazi. Ka qenë këtu para, gjatë dhe pas miratimit të reformës në drejtësi. A ka ndonjë bashkëpunim mes Komisionit Europian dhe Komisionit të Venecias, në kohën kur ju vlerësoni reformën në drejtësi?” e pyeti komisionerin znj. Tare. 

“Sigurisht ne vëzhgojmë nga afër punën e Komisionit të Venecias, ne e koordinojmë punën me ta dhe mbështetemi në punën dhe ndihmën e tyre, sepse ata i marrin të dhënat direkt nga terreni dhe ne do të vazhdojmë të punojmë së bashku,” u përgjigj z. Varhelyi.

Gjatë intervistës komisioneri deklaroi gjithashtu se ishte i bindur në përparimin e Shqipërisë dhe se vendi nëse përqendron të gjitha forcat do t’ia dalë të kapërcejë të gjitha parakushtet e vëna nga vendet skeptike.

Ai gjithashtu nënvizoi rëndësinë e frymës së bashkëpunimit midis politikanëve shqiptarë për të bindur vendet për progresin. 

Lexoni gjithashtu:

Negociatat, Komisioneri Oliver Varhelyi shpjegon në Ilva Now procesin dhe afatet e pritshme

Varhelyi optimist për Shqipërinë: Vendi do t’i përmbushë kushtet e vëna nga Holanda dhe Gjermania

Kush do të trokasë i pari në portën e BE, RMV apo Shqipëria? Varhelyi: I vetmi kriter është merita