A do të rikthehet Ilir Meta në LSI? Luan Rama tregon qëllimet e partisë së tij

Zëvendëskryetari i LSI-së Luan Rama konfirmoi në “Ilva Now” se opozita e bashkuar do të mbështesë kreun e PD-së Lulzim Bashën për kryeministër të Shqipërisë. Ai u shpreh se në kushtet ku ndodhet sot vendi, jo vetëm Basha, por çdo emër tjetër nga opozita do të ishte një alternativë më e mirë se ajo që do ofronte mazhoranca aktuale.

“Përballë faktit se kush po e qeveris vendin, jo vetëm emri i zotit Basha dhe çdo emër tjetër do ishte më i mirë. Ajo që sot përbën diferencën është oferta për të krijuar institucionin, oferta e ekipit, dhe jo oferta e krijuar mbi kultin dhe autoritetin e kryeministrit, dhe në këtë pikëpamje është një qasje e kohës. Po, nuk është çudi”, tha ai.

Teksa komentoi retorikën e ashpër të kreut të shtetit Ilir Meta për kryeministrin në lidhje me marrëveshjen e 5 qershorit, zëvendëskryetari i LSI-së tha se kjo çështje është parimore, pasi ka të bëjë me ruajtjen e standardit demokratik.

“Presidenti i Republikës është autoriteti më i lartë i shtetit, përgjegjës për ruajtjen e integriteti kushtetues të vendit, por është përgjegjës e stabilitetin e vendit dhe ruajtjen e demokracisë. Fokusi i tij në marrëveshjen e 5 qershorit është parimore, sepse ka të bëjë me një standard demokratik”, tha ai.

I pyetur për një rikthim të mundshëm të presidentit Ilir Meta në LSI, z. Rama dha këtë përgjigje:

“Jo! Ilir Meta është presidenti i republikës dhe nuk mund të flasim me sikur. Në politikë nuk behën analizat me sikur, dhe natyrisht raportin i tij me LSI është ai që të gjithë e njohin, sepse LSI është forcë politike e themeluar prej tij, por që prej kohës kur është zgjedhur president  jemi secili në tagrin e vet, ne si aktor politik, dhe ai në përgjegjësinë e kryetarit të shtetit”, tha Rama.

Intervista e plotë: