A do të ketë tërmete të reja në Santorini: Sizmologët grekë bëjnë parashikime 

Sizmologu grek Kostas Papazachos tha sot se frekuenca e tërmeteve që godasin Santorinin dhe ishujt përreth është ulur ditët e fundit, por se është e pasigurt nëse lëkundjet do të vazhdojnë edhe në javët në vijim.

“Fatkeqësisht, tani për tani duhet të presim. Këto sekuenca sizmike nuk përfundojnë shpejt. Ato ndjekin afatin e tyre kohor”, tha Papazachos për radion shtetërore ERT.

Ai tha se Santorini, një ishull vullkanik, nuk është në rrezik nga shpërthimi vullkanik, por vuri në dukje se magma ndikon në tërmetet, raportoi AP.

Papazachos, i cili është profesor i gjeofizikës në Universitetin e Selanikut, është aktualisht anëtar i dy komiteteve të urgjencës që përfshijnë shkencëtarë dhe zyrtarë nga qeveria, ushtria dhe shërbimet e urgjencës.

Qeveria greke njoftoi sot se po krijohet një port emergjent në Santorini në rast të evakuimit në shkallë të gjerë të popullsisë.

Një gjendje e jashtëzakonshme është shpallur në Santorini dhe ishujt e afërt të Ios, Amorgos dhe Anafi, pas tërmeteve të shpeshta këtë muaj që nxitën mijëra banorë dhe punëtorë të evakuohen në kontinentin grek.

Tërmete me magnitudë deri në 5.1 ballë të shkallës Rihter janë regjistruar sot në zonën e kufizuar nga këta katër ishuj.