A do të tërhiqet qeveria për aeroportin e Vlorës? Kryeministri Rama përgjigjet prerë

Gazetarja Ilva Tare pyeti kryeministrin Rama nëse qeveria e tij po shikon mundësinë për të ndryshuar vendin ku do të ndërtohet aeroporti i Vlorës për shkak të shqetësimeve që kanë ngritur mbrojtësit e mjedisit, por përgjigjja e tij ishte e prerë.

“Nuk ka hapësirë për negociata dhe do të nisë puna menjëherë. Ka disa që janë kundër por ka edhe disa që janë pro. Zhvillimi i këtij vendi nuk do të ndalet. Aeroporti i Vlorës do të bëhet dhe do të ndërtohet në gjurmët e aeroportit që ka qene aty edhe në  kohë kur nuk kishte zhvillim dhe nuk do të cenojë asgjë nga mjedisi”, tha kreu i qeverisë.

Z. Rama deklaroi se qeveria e drejtuar prej tij ka treguar se i dëgjon zërat kritikë dhe ka pasur edhe tërheqje kur ato kanë qenë të drejta, por për rastin e aeroportit të Vlorës tha se nuk do të ketë dëmtim të mjedisit.

“Do të jetë një pikë e re referimi dhe me planet që kemi shumë miqësore për mjedisin, ajo zonë do të bëhet një nga më të bukura në Shqipëri. Në përulje të plotë të natyrës. Njerëzit që do të jenë kundër do t’i dëgjojmë, por jemi këtu për të udhëhequr”, tha ai.