A do të ulet në bisedime? Putin flet për herë të parë për zgjedhjen e Trump

Presidenti rus Vladimir Putin mbajti të enjten një fjalim në Moskë, ku preku një sërë temash në lidhje me situatën globale.

Putin foli edhe për përshtypjet që i kishte lënë atentati ndaj Donald Trump.

Shefi i Kremlinit u ndal te momenti kur Trump pasi ishte plagosur ngriti grushtin lart dhe iu drejtua popullit me fjalët “luftoni, luftoni, luftoni”.

“Ai u soll, për mendimin tim, në një mënyrë shumë korrekte, me guxim, si një burrë,” tha Putin.

I pyetur nëse ai ishte gati të ulej në diskutime me Donald Trump, Putin u përgjigj: “Ne jemi gati!”

Trump nga ana tjetër deklaroi të enjten se ishte i përgatitur të fliste me Putinin, duke i thënë NBC Neës: “Unë mendoj se do të flasim”.

Kremlini u akuzua gjerësisht për ndërhyrje në zgjedhjet presidenciale të vitit 2016 për të nxitur fushatën e Donald Trump kundër Hilary Clinton, pretendime të kundërshtuara nga Moska.

Prokurori i Posaçëm i SHBA Robert Mueller hetoi akuzat për marrëveshje të fshehtë midis fushatës së Trump dhe Rusisë në vitin 2016, por tha në një raport tre vjet më vonë se nuk kishte gjetur prova të konspiracionit.

Deklaratat e Putin u bënë teksa udhëheqësit evropianë u mblodhën në Budapest në kuadër të Komunitetin Politik Evropian, ku diskutuan kthimin e Trump në Shtëpinë e Bardhë.

Presidenti ukrainas Volodymyr Zelensky tha se kishte patur një “bisedë shumë të ngrohtë” dhe “produktive” me presidentin e zgjedhur.

“Por ne duhet të bëjmë gjithçka për të siguruar që rezultatet e ndërveprimit tonë midis Ukrainës dhe Amerikës, të gjithë Evropës dhe Amerikës, të jenë produktive dhe pozitive,” shtoi ai.

Shumë në Ukrainë dhe Evropë janë të shqetësuar se Trump mund të ngadalësojë, nëse jo të ndalojë, rrjedhën e ndihmës ushtarake amerikane në Kiev me marrjen e pushtetit në janar.

Kryeministri i Mbretërisë së Bashkuar Sir Keir Starmer e siguroi Zelenskyn në samit se mbështetja e Mbretërisë së Bashkuar për Ukrainën në luftën e saj ndaj Rusisë mbetet e hekurt.

LEXONI GJITHASHTU:

• Trump u zgjodh president i SHBA, Biden: Vullneti i qytetarëve fiton gjithmonë
• Von der Leyen uron Trump për fitoren: Mezi presim të forcojmë lidhjet BE-SHBA