A e ftoi Trump Alice Weidel të AfD-së në Shtëpinë e Bardhë?

Një sërë postimesh, videosh dhe fotosh të transmetuara në platformën X dhe Facebook kanë supozuar  se Presidenti i SHBA-së Donald Trump i ka bërë një ftesë personale nga Shtëpia e Bardhë Alice Weidel, bashkëkryetares së Alternativës për Gjermaninë, AfD, të ekstremit të djathtë.

“Donald Trump ka ftuar zyrtarisht Weidel dhe AfD-në në Uashington”, deklaroi një përdorues i X.

Edhe llogari të tjera pro-AfD-së e kanë transmetuar këtë pretendim. Pretendohet se Weidel po planifikon një fluturim për në Uashington “për të takuar Trumpin”.

Më 26 tetor, përfaqësuesja republikane e SHBA-së, Anna Paulina Luna, i bëri një ftesë për t’u takuar Weidel në një postim X.

“Ju lutem merrni në konsideratë të vini me një delegacion të anëtarëve tuaj nga AfD në Uashington DC. Do të doja t’ju prisja me disa anëtarë të tjerë të Kongresit”, tha ajo.

Të nesërmen, Weidel dha një përgjigje, duke deklaruar se do të kontaktonte Lunën për të diskutuar se si ta “bënin të mundur”.

Më 29 tetor, Luna postoi se ishte takuar me Anna Rathert, një politikane të AfD-së në Bundestag, duke shtuar se do të priste AfD-në për një takim në dhjetor.

Një zëdhënës i Lunës i tha ekipit të verifikimit të Euronews, The Cube, se kongresmenja ishte e hapur për t’u takuar me Weidel dhe se ajo do të priste një delegacion të AfD-së në dhjetor.

Sipas USAGov, faqja zyrtare e internetit për informacionin dhe shërbimet qeveritare, takimet e iniciuara nga anëtarë individualë të Kongresit konsiderohen shtrirje partiake dhe jo diplomaci zyrtare.

Vetëm dega ekzekutive e qeverisë amerikane, që përfshin Shtëpinë e Bardhë dhe Trump-in, ka autoritetin për të kryer angazhime në nivel qeveritar me aktorët politikë të huaj.

Siaps raportimeve, vizita të tilla zyrtare koordinohen përmes Departamentit të Shtetit të SHBA-së dhe zakonisht gjenerojnë njoftime për shtyp ose regjistrohen në regjistrat zyrtarë të vizitorëve. Në të kundërt, një ftesë e lëshuar nga një ligjvënës individual i SHBA-së, siç është Luna, nuk kërkon përfshirjen e degës ekzekutive dhe për këtë arsye sinjalizon mungesën e përfshirjes së menjëhershme të Shtëpisë së Bardhë.

Anëtarët e Kongresit mund të mbështesin ose sfidojnë politikën e jashtme, sipas Shërbimit Kërkimor të Kongresit, por nuk mund të kryejnë vetë diplomaci zyrtare.

Për AfD-në, ftesa e Lunës është një sinjal se partia ka aleatë në sistemin politik amerikan, por kjo nuk përbën një qëndrim zyrtar nga qeveria amerikane.

Pavarësisht se nuk ka marrë një ftesë nga vetë Trump, AfD ka punuar për të forcuar marrëdhënien e saj me administratën amerikane.

Në shtator, nënkryetarja e AfD-së, Beatrich von Storch, deklaroi se kishte vizituar Shtëpinë e Bardhë për të zhvilluar bisedime strategjike me “përfaqësues amerikanë nga Këshilli i Politikës së Brendshme, Zyra e Zëvendëspresidentit, Këshilli i Sigurisë Kombëtare dhe Departamenti i Shtetit”.

LEXONI GJITHASHTU:

• Trump autorizoi CIA-n që të kryente operacione të fshehta në Venezuelë
• Trump: Do testojmë armët bërthamore për herë të parë pas 30 vitesh