A ka frikë për shpërthimin e vullkanit në Santorini, çfarë thonë ekspertët

Një situatë alarmante raportohet nga ishulli grek i Santorinit, ku më shumë se 200 lëkundje sizmike janë regjistruar gjatë 3 ditëve të fundit.

Tërmeti më i fuqishëm ka pasur një magnitudë prej 4.6 ballë shkallës së Rihterit, me epiqendër pranë ishullit të pabanuar Anidros, pranë Santorinit.

Mediat raportojnë se shumë turiste po kërkojnë të largohen nga ishulli.

Një mbledhje urgjente u zhvillua mbrëmjen e të dielës nën drejtimin e Kryeministrit Kyriakos Mitsotakis për të vlerësuar situatën. Forcat e Emergjencës janë dërguar në zonë me ekipe shpëtimi dhe pajisje dron.

Shkollat janë mbyllur dhe Forcat e Armatosura janë në gatishmëri për të ndihmuar në rast emergjence. Autoritetet detare kanë udhëzuar pronarët e mjeteve lundruese të jenë në gatishmëri për evakuim të mundshëm.

Frika ishte se ndoshta një tërmet i fuqishëm do të aktivizonte vullkanin e fjetur në ishull, por një gjë e tillë është përjashtuar këtë herë nga ekspertët.

Megjithatë rreziku i një tërmeti deri në 6 shkallë të Rihterit nuk përjashtohet.

Santorini është një ishull i krijuar pas një shpërthimi vullkanik 3500 vjet më parë dhe ndodhet në një zonë sizmike me intensitet të lartë.

Tërmeti i fundit që goditi ishullin ka qenë 7.5 ballë dhe ndodhi pothuajse 70 vjet më parë. Tërmeti shkaktoi 100 viktima, shkatërroi plotësisht 35% të banesave dhe u pasua nga një cunami. Ekspertët thonë se nuk ka frikë për një tërmet të tillë pasi do t’i duhen rreth 1 mijë vjet për t’u përsëritur.

LEXONI GJITHASHTU:

• Frika për një tërmet të madh, Greqia dërgon ekipet e shpëtimit në Santorini
• Tërmeti i fortë godet ishullin grek, sa ishte magnituda