“A synon Rusia pushtimin e gjithë Ukrainës”- Trump tregon pyetjen që i bëri Putinit

Sekretari amerikan i Shtetit mbërriti këtë mëngjes në Arabinë Saudite për bisedime me zyrtarët rusë mbi luftën në Ukrainë, ndërkohë që presidenti amerikan Donald Trump ka sinjalizuar mundësinë e një takimi të afërt me presidentin rus, Vladimir Putin.

Gjatë një deklarate për gazetarët të dielën, Trump tha se mund të takohet me Putinin në Arabinë Saudite “shumë shpejt”. Ai shprehu bindjen se lideri rus dëshiron t’i japë fund luftës:

“Unë mendoj se Putini dëshiron të ndalojë së luftuari,” tha Trump, duke shtuar se edhe pala ukrainase ka të njëjtin qëllim. “Të dy duan t’i japin fund sa më shpejt luftës. Zelensky gjithashtu dëshiron t’i japë fund.”

I pyetur nga gazetarët nëse beson se Putini synon të pushtojë të gjithë Ukrainën, Trump u shpreh: “Kjo ishte pyetja ime për të. Nëse ai do të dëshironte të vazhdonte luftën… kjo do të më kishte shkaktuar një problem të madh.”

Javën e kaluar, Trump konfirmoi se kishte zhvilluar një telefonatë “të gjatë dhe shumë produktive” me Putinin për të diskutuar përfundimin e luftës, duke e përshkruar si një hap të rëndësishëm drejt paqes përmes diplomacisë.

Teksa zyrtarët amerikanë do të takohen me ata rusë në Arabinë Saudite, liderët evropianë do të zhvillojnë këtë të hënë një samit për Ukrainën në Paris.

Në bisedimet e Parisit pritet të marrin pjesë përfaqësues nga Mbretëria e Bashkuar, Franca, Gjermania, Italia, Polonia, Spanja dhe Danimarka, si dhe përfaqësues nga Këshilli i BE-së dhe NATO-ja.

LEXONI GJITHASHTU:

• Zelensky: Ukraina nuk u ftua për bisedimet SHBA-Rusi në Arabinë Saudite
• Starmer: I gatshëm të vendos trupa në terren në Ukrainë për të mbrojtur paqen