Abdixhiku: Kurti i solli Kosovës një marrëveshje pa njohje dhe me Asociacion

Kryetari i LDK-së, Lumir Abdixhiku ka reaguar pas arritjes së dakordësisë mes Kosovës dhe Serbisë në orët e vona të së shtunës mbi aneksin e zbatimit të planit evropian.

Ai është shprehur se kryeministri i Kosovës, Albin Kurti i ka sjellë mbrëmë Kosovës një marrëveshje pa njohje, jo finale dhe me Asociacion.

“Mashtrim dhe humbje e një mundësie historike – ky është epilogu i Kurtit si kryeministër në dialog. Një kauzë politike e rremë – që Kosovës i kushtoi tmerrësisht shumë – përfundoi sonte. Kushtet e vëna, fjalimet e thëna, qëndrimet e dhëna, thjeshtë u zhbënë. Përveç saj, një marrëveshje pa njohje, jo finale dhe me asociacion plus në të është çfarë Kurti i solli Kosovës sot. Kjo gjendje e re, e shndërruar si detyrim integrues për vendin tonë, është e pariparueshme më”, ka shkruar Abdixhiku në Facebook.

Kosova dhe Serbia kanë rënë dakord mbi aneksin e zbatimit të planit evropian, i cili do të jetë i detyrueshëm për të dyja palët në momentin e publikimit të tij. Kështu ka thënë përfaqësuesi i lartë i BE, Josep Borrell në një deklaratë për mediat pas dialogut 12 orësh mes kryeministrit të Kosovës, Albin Kurti dhe presidenti i Serbisë, Aleksandër Vuçiç nën ndërmjetësimin e BE në Ohër.

LEXONI GJITHASHTU:

• Kurti: Pajtimi për aneksin e zbatimit të marrëveshjes, njohje de-facto e Kosovës
• Zbardhet aneksi i zbatimit të marrëveshjes Kosovë-Serbi