Abuzimi me të miturit, bilanci alarmant, në 3 vjet mediat kanë raportuar mbi 15 raste

Mbi 15 raste abuzimi seksual me të mitur në 3 vite. Është ky bilanci alarmant nga raportimet e mediave për fenomenin e kthyer në shqetësim shoqëror dhe që gjithnjë shoqërohet me debate të shumta.

Ndër rastet më të bujshme, është ai i përdhunimit të një vajze 15-vjeçare nga roja e shkollës në periferi të Tiranës, ngjarje që nxiti edhe protesta kundër abuzimit me të miturit.

Sipas raportimeve, roja 65-vjeçar, jo vetëm ka abuzuar me të miturën, por edhe e ka filmuar dhe e ka ndarë videon me disa të rinj, të cilët gjithashtu kanë abuzuar me vajzën. Të katërt përfunduan në pranga.

Një tjetër rast është ai i 21 prillit 2020, ku një 72-vjeçar u arrestua pas akuzave për abuzim me një të mitur 17-vjeçare. Ngjarja ka ndodhur në Sarandë, në kohë të ndryshme, ndërsa raportohet se 72-vjeçari kishte abuzuar edhe me një tjetër vajzë, akte të cilat ai i pranoi pas ndalimit nga policia.

Një rast i rëndë i abuzimit është edhe ai i regjistruar në 5 shkurt të 2019 në Kavajë, ku një 14-vjeçare ishte abuzuar seksualisht dhe shantazhuar për një kohë të gjatë nga 8 adoleshentë.

Ngjarja në fjalë është zbuluar nga njëra prej mësueseve të vajzës, e cila ka informuar nënën e të miturës, që më pas ka bërë edhe denoncimin në polici.

Ngjarje të tjera të abuzimit janë raportuar në qytete si Elbasani, Durrësi, Fieri, teksa fenomeni është i shpërndarë në të gjithë territorin e Shqipërisë.

Por ajo çfarë është më shqetësuese është fakti se një pjesë e madhe e këtyre abuzimeve janë kryer nga persona në institucione shtetërore, që në parim duhet të jenë aty për t’i mbrojtur të miturit.