Afron debati presidencial në SHBA, rriten tensionet Trump-Harris

Rritet tensioni kur afron sfida e parë dhe ndoshta e vetme direkte përpara zgjedhjeve të 5 nëntorit mes Kamala Herris dhe Donald Tramp, me sondazhet e fundit që i nxjerrin kokë më kokë, ose me një diferencë fare të ngushtë herë në favor të miliarderit të pasurive të patundshme e herë në favor të zëvendës presidentes.

Në prag të debatit në “ABC News”, kandidatja demokrate dhe ai republikan kanë intensifikuar përgatitjet me stafet përkatëse për t’u përballur me pyetjet e gazetarëve, gjykimin e publikut dhe për sulmet e kundërshtarit.

E sistemuar në hotelin e saj në Pitsburg të Pensilvanisë, ku do të qëndrojë deri në momentin e sfidës, zëvendës presidentja është rrethuar nga këshilltarët më të besuar dhe më të përgatitur.

Mes tyre është Filip Reines, ish-këshilltar i Hillari Klinton kur ishte sekretare e Shtetit, i cili këtë herë luan rolin e Tramp. Gjithashtu nuk mungojnë veterania e dueleve Karen Dan dhe Rohini Kosoglu, ish-këshilltare për politikën e brendshme dhe shefe e personelit të Senatit.

Konkurrenca është e lartë sidomos për Herris, pasi në sondazhin më të fundit të “Nju Jork Tajms” dhe “Siena Kollexh” 28 për qind e zgjedhësve u shprehën të pavendosur për figurën e saj dhe së kishin nevojë ta njihnin më mirë.

Stafi i saj u ankua tek bordi i “ABC News” për faktin se ka zgjedhur formatin me mikrofona të fikur, i njëjti i përdorur nga CNN në duelin mes Tramp dhe Bajden, duke argumentuar se një gjë e tillë do të cënojë kandidaten demokrate dhe do të mbrojë atë republikan nga përballja direkte.

Nga ana tjetër, Tramp paralajmëroi ditën e diel se, në rast se fiton do të dënojë zyrtarët elektoralë të cilët i konsideron mashtrues. Ai është ankuar se votimet në shtetin e Pensilvanisë do të jenë një mashtrim, ndërsa është zotuar se do të falë kryengritësit e 6 janarit.