Agjentët amerikanë të ICE do të mbështesin sigurinë në Lojërat Olimpike Dimërore, reagime të shumta në Itali

Agjentët e Imigracionit dhe Doganave të SHBA-së, ICE do të vendosen në Itali për Lojërat Olimpike Dimërore i cili zhvillohet më 6-22 shkurt. Sipas njoftimit gjatë Lojërave Olimpike, ICE do të mbështesë Shërbimin e Sigurisë Diplomatike të Departamentit të Shtetit dhe vendin pritës për të vlerësuar dhe zbutur rreziqet që lidhen me organizatat kriminale.

Prania e mundshme e agjentëve të ICE-së në Lojërat Olimpike Dimërore ka shkaktuar polemika në Itali pas vrasjeve të dy qytetarëve amerikanë në Minneapolis.

Autoritetet italiane fillimisht mohuan praninë e agjentëve të ICE-së, por më pas u përpoqën ta minimizojnë rolin e tyre duke pretenduar se ata do të ishin të përfshirë në mbrojtjen e sigurisë së ekipit amerikan.

Ministri i Brendshëm italian Matteo Piandendozi theksoi se ICE nuk do të kryejë operacione në Itali, sepse menaxhimi i rendit publik, imigracionit dhe sigurisë i përket forcave italiane policore.

Ligjvënës aktualë dhe ish-ligjvënës i kanë kërkuar kryeministres italiane Giorgia Meloni të ndërhyjë për të bllokuar praninë e agjentëve pas dy të shtënave fatale gjatë një operacioni kundër imigracionit në Minneapolis.

Ish-kryeministri italian Giuseppe Conte i kërkoi qeverisë së vendit të vendosë kufijtë e vet dhe “të marrë vendime të qarta.

“Pas dhunës në rrugë dhe vrasjeve në SHBA, tani mësojmë nga zëdhënësi i tyre se agjentët e ICE do të vijnë në Itali për të garantuar sigurinë në Lojërat Olimpike Milano-Cortina”, shkroi Conte në X të martën, duke iu referuar raportimeve që citojnë ICE në mediat italiane.

“Nuk mund ta lejojmë këtë. Qeveria jonë u përpoq ta minimizonte situatën, por këto deklarata të fundit flasin qartë për vendosmërinë e ICE-së për të ardhur dhe për të siguruar ‘sigurinë’ edhe në Itali. Mjaft me përkuljen”, shtoi Conte.

Kryetari i bashkisë së Milanos, Giuseppe Sala, deklaroi se autoritetet nuk kanë nevojë për ICE për të zbatuar sigurinë në Lojërat Olimpike, duke theksuar se ata nuk janë të mirëpritur në Milano.