‘Ahengu shkodran’, edicioni i 9-të në Ditën Kombëtare të Trashëgimisë Kulturore

“Ahengu shkodran”, një traditë e kahershme zhvilloi edicionin e 9-të. Një ndërthurje e këngëve të vjetra me ato të reja u kënduan në shtëpinë muze të Oso Kukës.

Martina Sarreqi dhe Ivan Tanushi janë pjesëmarrësit më të rinj në moshë. Ata kënduan për publikuan disa këngë tradicionale të Shkodrës.

“Janë këngë me të vërtet të bukura. Edhe thjesht fakti që unë jam në kaq moshë  të re dhe përcjell traditat e këtyre që kanë lënë pas gjithë këtë mrekulli”, thotë Martina Sarreqi.

Ivan Tanushi shprehet se ishte ndjerë i privilegjuar kur kishte marrë ftesën, të cilën siç tha e kishte pranuar me shumë dashuri duke ditur edhe nivelin e lartë që ka ky event muzikor.

Organizatorët dhe këngëtarët pjesëmarrës tregojnë emocionet dhe kënaqësinë e organizimit të këtij koncerti që është një ndër 7 kryeveprat e trashëgimisë kombëtare shpirtërore.

“Më bëri përshtypje se sot, duke përjashtuar ndoshta vetveten, ishin një brez i ri këngëtarësh që kanë një të ardhme shumë të mirë me këngën shkodrane”, thotë këngëtari i mirënjohur Bujar Qamili.

“Ahengu shkodran” u organizua në kuadër të Ditës Kombëtare të Trashëgimisë Kulturore.