Aksident gjatë lëshimit të anijes në Korenë e Veriut, Kim Jong Un: Akt kriminal

Një ceremoni zyrtare për prezantimin e një anijeje të re luftarake në flotën detare të Koresë së Veriut u kthye në një moment të sikletshëm dhe të turpshëm, pasi shkatërruesi 5,000 tonësh pësoi një aksident gjatë lëshimit në det, në qytetin portual lindor të Chongjin.

Udhëheqësi i Koresë së Veriut, Kim Jong-un, ishte i pranishëm në ngjarje dhe reagoi ashpër ndaj incidentit, të cilin e përshkroi si një “akt kriminal” dhe “aksident të rëndë” të shkaktuar nga “pakujdesia absolute dhe papërgjegjësia”.

Sipas agjencisë shtetërore të lajmeve KCNA, anija humbi ekuilibrin gjatë lëshimit, duke pësuar dëmtime në pjesën e poshtme të trupit. Kim akuzoi komandën teknike për “mungesë përvoje dhe pakujdesi operative” dhe tha se kjo ngjarje e kishte “çuar dinjitetin dhe vetërespektin e shtetit në kolaps”.

Lideri koreano-verior urdhëroi që anija të rikthehet në gjendje funksionale përpara një mbledhjeje kyçe të Partisë së Punëtorëve që do të mbahet muajin e ardhshëm. Ai paralajmëroi se zyrtarët përgjegjës do të përballen me pasoja në mbledhjen plenare të komitetit qendror të partisë në qershor.

Incidenti vjen në një kohë kur Koreja e Veriut përpiqet të tregojë forcën e saj ushtarake përballë tensioneve të vazhdueshme në rajon.

LEXONI GJITHASHTU:

• Britania e Madhe do të nënshkruajë marrëveshje me Mauritiusin
• “Akt i tmerrshëm antisemit”, Netanyahu reagon pas vrasjes së punonjësve të ambasadës