Aksident tragjik në Slloveni, të paktën 5 viktima

Të paktën pesë persona humbën jetën sot në një aksident të rëndë trafiku që ndodhi në autostradën Styriane, në Slloveni.

Për shkak të aksidentit, autostrada midis Tepinjës dhe tunelit të Golos do të jetë e mbyllur për një kohë të gjatë.

Departamenti i policisë së Celjes fillimisht njoftoi se katër persona u vranë dhe dy u plagosën, por më vonë konfirmoi se një person tjetër ndërroi jetë nga plagët e marra në aksident.

Aksidenti ndodhi kur shoferi i furgonit, për shkak të shpejtësisë së papërshtatshme, goditi pjesën e pasme të një kamioni.

Shoferi i furgonit është një shtetas ukrainas, i cili vetë u plagos lehtë, një nga pasagjerët u plagos rëndë, ndërsa pesë prej tyre humbën jetën.

Sipas informacioneve të para të policisë, shoferi i kamionit është shtetas rus.