Akuzohet për marrje ryshfeti, zëvendës-ministri rus i Mbrojtjes lihet në paraburgim

Një zëvendësministër rus i Mbrojtjes është akuzuar për marrje ryshfeti dhe është lënë në paraburgim nga një gjykatë në Moskë.

Sipas mediave të huaja, Timur Ivanov, i cili mohon akuzat, akuzohet për pranim ryshfeti “në një shkallë veçanërisht të madhe”.

I emëruar në Ministrinë e Mbrojtjes në vitin 2016, Ivanov, 47 vjeç, ka qenë përgjegjës për projektet e infrastrukturës ushtarake të Rusisë.

Aktivistët kanë kritikuar prej kohësh nivelet e korrupsionit të dyshuar në Rusi.

Megjithatë, raste të tilla të profilit të lartë kanë qenë të rralla që nga fillimi i pushtimit të plotë të Ukrainës nga Rusia në vitin 2022.

Ivanov konsiderohet aleat i ministrit të Mbrojtjes, Sergei Shoigu dhe ka punuar me të për shumë vite. Ai ka qenë më parë zëvendëskryeministër i rajonit të Moskës, ku Shoigu shërbeu për një kohë të shkurtër si guvernator.

Kremlini ka hedhur poshtë raportimet në disa media ruse se arsyeja e vërtetë për arrestimin e Ivanov ishte se ai dyshohej për tradhti.

“Ka shumë interpretime të ndryshme rreth gjithë kësaj tani… Ju duhet të përqendroheni në informacionin zyrtar,” u tha gazetarëve zëdhënësi Dmitry Peskov.

Ai gjithashtu deklaroi se presidenti Vladimir Putin ishte njoftuar paraprakisht për ndalimin e Ivanov.

LEXONI GJITHASHTU:

• Armët bërthamore në Poloni, reagon Rusia: Paralajmëron hakmarrje
• Eurodeputetët thirrje për sekuestrimin e qindra mld të aseteve të ngrira të Rusisë