Al Nassr fiton 3-1, Ronaldo lëndohet dhe rrezikon Botërorin 2026

Al Nassr mori një fitore të rëndësishme 3-1 ndaj Al Fayha në Ligën Profesionale Saudite, në stadiumin Al Majma’ah Sports City në Majmaah, duke përmbysur disavantazhin 1-0 të pjesës së parë pas autogolit të Abdulelah Al-Amri.

Skuadra e drejtuar nga Jorge Jesus reagoi në pjesën e dytë me golat e Sadio Mane dhe Abdullah Al-Hamdan, si dhe një autogol të Orlando Mosquera, duke siguruar tre pikët dhe duke u ngjitur dy pikë mbi Al Ahli në krye të renditjes.

Megjithatë, ndeshja u shoqërua me një lajm shqetësues për Cristiano Ronaldon. 41-vjeçari u largua nga fusha në minutën e 81-të për shkak të një dëmtimi muskulor, ndërsa më herët kishte humbur edhe një penallti në momentin kur rezultati ishte 0-0. Pas ndeshjes, Jorge Jesus konfirmoi se lojtari do t’i nënshtrohet testeve urgjente për të përcaktuar shkallën e dëmtimit.

Sipas raportimeve, ekziston frika se një dëmtim serioz mund ta rrezikojë pjesëmarrjen e Ronaldos në Kupën e Botës 2026, që nis në qershor në SHBA, Kanada dhe Meksikë. Sulmuesi portugez synon të bëhet lojtari i parë që merr pjesë në gjashtë finale të Botërorit, pasi ka luajtur në çdo edicion që nga viti 2006.