Alarmi i Shefit të Inteligjencës Finlandeze: Reformimi i ushtrisë ruse, kërcënim

Reformat e planifikuara në ushtrinë ruse, përfshirë rritjen e numrit të ushtarëve me 30 për qind, paraqesin një kërcënim të drejtpërdrejtë për NATO-n, deklaroi më 16 janar shefi i shërbimit të inteligjencës ushtarake të Finlandës, Pekka Turunen. Në një intervistë për agjencinë Reuters, Turunen theksoi nevojën për rritjen e vigjilencës në rajon.

Finlanda, e cila ndan kufirin më të gjatë të Bashkimit Evropian me Rusinë, iu bashkua NATO-s në vitin 2023, ndërsa Suedia pasoi në mars të vitit 2024. Të dy shtetet nordike ndërmorën këtë hap si përgjigje ndaj pushtimit rus të Ukrainës.

Në rishikimin vjetor të publikuar të enjten, shërbimi i inteligjencës ushtarake i Finlandës vlerësoi se reformat në ushtrinë ruse janë planifikuar të përfundojnë deri në fund të vitit 2026. Sipas Turunen, Moska ka gjasa të arrijë qëllimet e saj ushtarake deri në vitin 2030.

“Ky është një kërcënim për NATO-n, sidomos nëse plani zbatohet plotësisht,” tha Turunen, duke theksuar se aleanca duhet të reagojë duke forcuar vigjilencën e saj.

Ministria e Mbrojtjes e Rusisë, në një deklaratë të dhjetorit të kaluar, paralajmëroi se Moska duhet të jetë e përgatitur për një konflikt të mundshëm me NATO-n në Evropë gjatë dekadës së ardhshme. Ndërkohë, presidenti rus Vladimir Putin minimizoi shqetësimet perëndimore, duke i quajtur ato si një “pretekst për të frikësuar popullatën me kërcënimin mitik rus”.

Rusia ka planifikuar të rrisë numrin e trupave të saj në 1.5 milion, që përbën një rritje prej 30 për qind. Turunen paralajmëroi gjithashtu se numri i trupave ruse të vendosur pranë kufirit me Finlandën mund të dyfishohet ose trefishohet krahasuar me periudhën para luftës në Ukrainë.

“Ne duhet të reagojmë me vigjilencë të shtuar ndaj këtyre zhvillimeve,” përfundoi Turunen.