Amazon: Kemi bllokuar aplikimet për punë! Agjentët e Koresë së Veriut po dërgojnë CV

Një drejtues i lartë i Amazon, Steven Schmidt  ka deklaruar se ka bllokuar më shumë se 1,800 aplikime për punë. Sipas tyre bllokimi i aplikimeve ka ardhur pas dyshimeve se agjentë të Koresë së Veriut kanë dërguar CV me identitete të vjedhura.

“Koreano-veriorët kanë tentuar të aplikojnë për punë në distancë në sektorin e IT-së duke përdorur identitete të vjedhura ose të rreme,” tha Schmidt.

Sipas tij qëllimi i agjentëve është të punësohen, të paguhen dhe t’i kanalizojnë pagat përsëri në vendin e tyre për të financuar programet e armatimit të regjimit. Autoritetet amerikane dhe të Koresë së Jugut kanë paralajmëruar për mashtrimet online të kryera nga agjentët e Phenianit.

Kompania shpjegoi se përdori një kombinim të mjeteve të inteligjencës artificiale (IA) dhe kontrolleve nga stafi i saj për të shqyrtuar aplikimet për punë.

Taktikat e përdorura nga mashtruesit janë bërë më të sofistikuara. Në veçanti, ata po hakojnë llogaritë joaktive të LinkedIn duke përdorur të dhënat e rrjedhura të hyrjes për t’i bërë ato të duken bindëse.

LEXONI GJITHASHTU:

• Fëmijët shqiptarë konsumojnë fruta dhe shumë pak perime
• Venezuela miraton ligjin kundër piraterisë dhe bllokadave pas sekuestrimeve nga SHBA