Ambasada e SHBA në Tiranë zbardh takimin mes gjeneralit amerikan dhe Ministrit të Mbrojtjes Ermal Nufi

Ambasada Amerikane në Tiranë, përmes një postimi në rrjetin social X, ka bërë të ditur këtë të premte se Gjenerali i Brigadës Chris McKinney i Komandës Evropiane të SHBA-së ka zhvilluar këtë javë një vizitë zyrtare në Tiranë.

Sipas njoftimit, gjenerali amerikan është takuar me Ministrin e Mbrojtjes Ermal Nufi, Shefin e Shtabit të Përgjithshëm të Forcave të Armatosura Arben Kingji, si dhe me udhëheqës të lartë të Forcave të Armatosura të Shqipërisë.

Ambasada bënë të ditur se diskutimet u përqendruan në sigurinë rajonale, shpenzimet e mbrojtjes, rëndësinë e lëvizshmërisë ushtarake përmes Korridorit Pan-Evropian VIII, si dhe në progresin mbresëlënës të Shqipërisë në kapacitetet e mbrojtjes kibernetike.

Gjithashtu, e pranishme në këtë takim ishte edhe e dërguara e SHBA-së në vendin tonë, Nancy Vanhorn.