Ambasadori Bergner takim me Mirela Bogdanin, vlerëson rolin e KLP-së

Ambasadori gjerman, Bergner ka zhvilluar këtë të mërkurë një takim me Kryetaren e KLP-së, Mirela Bogdani dhe anëtarët e Këshillit të Lartë të Prokurorisë.

Ambasada gjermane për mes një postimi në “Facebook” thekson se Bergner gjatë takimit nënvizoi rolin e rëndësishëm që KLP luan në ruajtjen e pavarësisë, integritetit, cilësisë dhe efikasitetit të prokurorive në Shqipëri.

Ai gjithashtu shprehu vlerësimin e tij për punën e përkushtuar të KLP-së dhe inkurajoi Këshillin të kryejë detyrat e tij në mënyrë aktive, me përgjegjësi dhe vetëdije.

Bergner theksoi sërish rëndësinë e zgjedhjes së ardhshme të pasardhësit në detyrë të Altin Dumanit si kreu i Prokurorisë së Posaçme SPAK.

“Nën drejtimin e Altin Dumanit SPAK ka arritur suksese jashtëzakonisht të rëndësishme në luftën kundër korrupsionit të të gjitha niveleve dhe krimit të organizuar. Është e rëndësishme që të vazhdojë të mbahet ky kurs.

Ne kemi besim, se zgjedhja e ardhshme do të zhvillohet në mënyrë transparente dhe se çdo anëtar i Këshillit të Lartë të Prokurorisë do të orientohet në vendimin e tij vetëm prej përgatitjes profesionale të kandidatëve dhe integritetit të tyre të padiskutueshëm”, u shpreh ai.

LEXONI GJITHASHTU:

• Pas 3 orësh del nga SPAK drejtoresha e AKSHI-t, Mirlinda Karçanaj
• Shefi i NATO: Rusia, Kina dhe Korea e Veriut po përgatiten për sulm ndaj Europës