Ambasadori gjerman: Presim që aktorët politikë të njohin zgjedhjet

Ambasada gjermane në Tiranë në një reagim mbi zgjedhjet e 25 prillit, thuhet se Kodi i ri Zgjedhor e kaloi me sukses testin e parë. Ambasadori Peter Zingraf thotë se është duke pritur raportin përfundimtar të OSBE/ODIHR për konkluzione por shton se dita e votimit ka shkuar “thuajse kudo e paqtë”.

Zingraf në deklaratën e tij thekson nga ana tjetër se “të gjitha akuzat dhe ankesat, që kanë të bëjnë me zgjedhjet, mes tyre edhe ato për shitblejren e votës, duhet të trajtohen pa vonesë dhe me vendosmëri”.

“Vetëpërmbajtja dhe maturia e shumë kandidateve dhe kandidatëve ditën e zgjedhjeve meriton respekt. Unë shpresoj që të gjithë aktorët politikë të kenë edhe në të ardhmen një qasje konstruktive dhe bashkëpunuese ndaj njëri-tjetrit. Krahas kësaj presim që ata të njohin rezultatin e zgjedhjeve”, shprehet ambasadori gjerman.

Për rrugën e Shqipërisë në integrimin në BE, ai thotë se pret që të gjitha partitë dhe aktorët politikë të kontribuojnë në mënyrë aktive dhe përmes reformash të tjera të bëhen hapa përpara.

Në fund, Zingraf përgëzoj Partinë Socialiste për fitoren dhe ka përgëzuar Partinë Demokratike, e cila sipas tij ka mundur të shënojë një rritje të konsiderueshme krahasuar me zgjedhjet e fundit.

“Një demokraci e shëndetshme ka nevojë për një opozitë të fortë parlamentare si dhe për përfshirjen dhe kontributin e saj aktiv, për shembull në ligje dhe vendime që kërkojnë shumicë të cilësuar”, shprehet ambasadori gjerman.