Ambasadori amerikan në Serbi, Christopher Hill deklaroi se formimi i Asociacionit të komunave me shumicë serbe në Kosovë, është detyrim që del prej Marrëveshjes së Brukselit.

Sipas tij, Asosacioni është një element kyç për të ecur përpara në dialogun Kosovë-Serbi.

“Të gjithë negociatorët dhe ndërmjetësuesit, qoftë në Bashkimin Evropian, apo në Shtetet e Bashkuara, e kanë konfirmuar që ky është një detyrim që del nga Marrëveshja e Brukselit. Është element kyç për të ecur përpara.

Pastaj vjen ajo që thuhet në planin franko-gjerman, i cili gëzon mbështetjen e BE-së. Ai përfshin ide më të gjera që do të kërkojnë pak më shumë kohë”, ka thënë Hill.

Ai i ka bërë këto deklarata në ceremoninë e nënshkrimit të një memorandumi bashkëpunimi në mes të Serbisë dhe Agjencisë amerikane për Zhvillim Ndërkombëtar (USAID).

Hill ka thënë, po ashtu, se Asociacioni nuk mund të krijohet menjëherë, duke shtuar se është e nevojshme që të punohet në disa aspekte.

LEXONI GJITHASHTU

• Rashiç konfirmon pjesëmarrjen në diskutimet e SHBA-së për Asociacionin
• Kosova ndalon qarkullimin e makinave me targa KM të regjistruara në dhjetor
• Kurti do dorëhiqet? Eksperti: Pas 17 shkurtit kryeministri i Kosovës do largohet