Ambasadorja e SHBA dhe kreu i KQZ zbresin në terren: Numëruesit të bëjnë punën e tyre

Ambasadorja e Shteteve të Bashkuara të Amerikës, Yuri Kim, ka zbritur sërish në terren, konkretisht në Qendrën e Votimit në “Vasil Shanto” në kryeqytet.

Kryediplomatja amerikane ishte e shoqëruar nga kreu i Komisionit Qendror të Zgjedhjeve, dhe prej andej tha se numëruesit duhet të bëjnë detyrën e tyre.

“Ne do ta shohim procesin nga afër. Votuesit shqiptarë e kanë bërë punën e tyre. Tani përgjegjësia mbetet mbi numëruesit për ta bërë punën e tyre me integritet. Dhe unë besoj se do ta bëjnë”, theksoi ambasadorja e SHBA.

Kryetari i KQZ-së, Ilirjan Celibashi, theksoi se kushdo qoftë humbësi duhet të pranojë rezultatin e zgjedhjeve të së dielës.

“Kjo tregon interesin e SHBA-ve, miqtë tanë e kanë kuptuar se sa e rëndësishme janë zgjedhjet për demokracinë dhe integrimin.Rezultati duhet pranuar nga humbësi, kushdo qoftë ai. Falënderoj miqtë e Shqipërisë, të cilët kanë treguar mbështetjen për procesin zgjedhor”, tha kryekomisioneri Ilirjan Celibashi.

Pas shkollës “Vasil Shanto”, ambasadorja Yuri Kim ka shkuar edhe në ambientet e “Shkollës së Kuqe”, ndërsa shtoi se SHBA ka qenë dhe do jetë në mbështetje të interesit të qytetarëve shqiptarë.

“Procesi i numërimit ka filluar për zgjedhjet në Shqipëri. Me kreun e KQZ-së vizitova qendrat e numërimit në Vasil Shanto & Shkolla e Kuqe. Punë të mbarë dhe FLM [faleminderit] për të gjithë sportelet dhe stafin që punon gjatë gjithë natës. Le të presim të gjithë me durim rezultatet. Shtetet e Bashkuara të Amerikës do të jetë me ju deri në fund”, shkruan ambasadorja Kim.

Counting process has begun for 🇦🇱 elections. With @KQZShqiperi @ICelibashi, I visited the counting centers at Vasil Shanto & Shkolla e Kuqe. Punë të mbarë & FLM to all counters & staff working through the night. Let’s all patiently await the results. 🇺🇸 will be w/you to the end!

— Ambassador Yuri Kim (@USAmbAlbania) April 25, 2021