Çipa: “Nisma Thurje” vepron si OJQ, Shabani: Jemi në terren çdo ditë, në çdo qytet

Në studion e “Ilva Now”, gjatë një diskutimi mbi faktin që elektorati s’ka prirje për partitë e reja, analisti Aleksandër Çipa i tha Endrit Shabanit se vetë partia e tyre, pra “Nisma Thurje” po vepron më tepër si OJQ se sa si parti politike.

Kryetari i “Nismës Thurje” replikoi duke thënë se kanë përgatitur një agjendë konkrete me projektligje, referendume dhe komisione hetimore dhe për t’i aplikuar kërkojnë ndihmën e votuesve. Me këtë argument ai theksoi se po veprojnë si parti, mirëpo mundësitë që të dëgjohet zëri i partive të vogla në Shqipëri janë të pakta.

“Ne u besojmë 321.000 votuesve që janë ende të lirë dhe po kërkojmë të na marrin në punë. U themi se duam të shkojmë në parlament, kemi 33 projektligje, kemi dy komisione hetimore që duam të ngremë, duke hyrë në parlament, duam të nisin një referendum nga parlamenti, kjo është agjenda jonë. Nëse ju doni që ne t’i materializojmë pa hyrë në parlament, ne kemi paraqitur një ofertë politike”, u shpreh z. Shabani.

Endrit Shabani shpjegoi se Nisma Thurje po bën fushatë aktive në terren, me aktivistë dhe kandidatë që shkojnë nëpër sheshe e tregje duke bërë thirrje për të votuar partinë e tyre.

“Kjo hapësirë në televizion është jashtëzakonisht e limituar. Ne nuk i kemi paratë për të bërë marketing nëpër televizione. Ne kemi krijuar kanalet tona të komunikimit. Ne jemi në terren çdo ditë, në çdo qytet të Shqipërisë, nëpër sheshe ke kandidatë Nismës Thurje që shkojnë nëpër tregje, shpërndajnë fletë-palosje, këto janë hapësirat që janë krijuar”, u shpreh kryetar i Nismës Thurje.

LEXONI GJITHASHTU:

• Arben Skënderi: Partitë e mëdha kanë polarizuar maksimalisht militantët e tyre
• Endrit Shabani: Një pjesë e mirë e qytetarëve besojnë se vendosin ndërkombëtarët kush qeveris
• Endrit Shabani: Partitë e mëdha prodhojnë gjithçka, përveç entuziazmit
• Arben Skënderi: Ndryshe nga zgjedhjet e tjera, qytetarët tashmë kanë alternativa
• Skënderi zbulon shqetësimin e PS dhe PD: Tmerrohen nga hyrja e alternativave në Parlament