Analisti Xhelal Neziri thotë se opozita maqedonase, por edhe një pjesë e popullsisë, janë kundër rolit të shqiptarëve në Maqedoninë e Veriut.

Në emisionin “Balkan Talks” në Euronews Albania, Neziri u shpreh se për hetë të parë, faktori shqiptar është fuqizuar dhe ka pushtet në Maqedoninë e Veriut, pasi gjysma e kabinetit qeveritar përbëhet nga ministra shqiptarë.

“Kjo qeveri aktuale, ëshgtë diku te 50-50 sipas përkatësisë etnike të ministrave. Gjysma janë maqedonas, gjysma janë shqiptarë. Gjë që flet për një fuqizim të faktorit shqiptar në Maqedoninë e Veriut. Fuqizim që nënkupton jo vetëm pjesëmarrje në koalicion siç ka qenë më parë, por bëhet fjalë për një bashkëqeverisje me partinë maqedonase, që e ngarkon me përgjegjësi të mëdha në drejtimin e shtetit.

Pra, është hera e parë që faktrori shqiptar ka pushtet në Maqedoninë e Veriut. Ky pushtet dhe ky moment i ri naturisht ka ngjallur edhe shqetësim, pikërisht ajo pjesë e opinionit publik maqedonas që e koncepton shtetin pronë të një etnie”, theksoi ai.