Ankohen pensionistët në Shkodër: Marrim pension qesharak

Pensionet e ulëta në vend e bëjnë të pamundur plotësimin e kërkesave minimale për pensionistët.

Rritja e çmimeve ka ulur mundësinë për të blerë produktet bazë, ndërsa shpresë për ta janë të ardhurat që i dërgojnë fëmijët nga emigracioni.

Gazetari i Euronews Albania pyeti të moshuarit në Shkodër sa i përket pensioneve. Shumica prej tyre theksojnë se marrin pension qesharak.

“Të mjeruar na ka zënë, me pensione të vogla me rroga të vogla. Si kjo qeveri nuk gjen në botë,” – u shpreh një zotëri.

“Si gjithë të tjerët si vitet tjera. Po normal rritja e çmimeve jo vetëm tek ne, por në të gjithë botën ka ndikuar. Kjo është sëmundje e përgjithshme,” – tha një tjetër qytetar.

Shpërblimin e fundvitit nga qeveria e vlerësojnë si të pamjaftueshëm.

“5 mijë lekëshin mirë që na e japin, ne sa ma shumë të na japësh aq më mirë është,” – tha një i moshuar.

“Çfarë t’i bësh 50 mijë lekë, ça është ky trishtim?! 50 mijë lekë as një drekë nuk është,” – u shpreh një tjetër.

Për festat e fundvitit pensionistët në Shqipëri presin përkrahje më të madhe nga shteti, pasi rritja e çmimeve të produkteve të shportës nuk i jep mundësinë të jetojnë normalisht.

LEXONI GJITHASHTU:

• Shpërblimi i fundvitit, pensionistët: 5 mijë lekë nuk të dalin për ilaçe