“Anora” triumfon në Oscar: Fiton pesë çmime, përfshirë dhe filmin më të mirë

Filmi komedi-dramë “Anora”, me regji nga Sean Baker, ishte fituesi i madh i mbrëmjes në ceremoninë e 97-të të çmimeve Oscar, duke rrëmbyer pesë trofe, përfshirë filmin më të mirë dhe aktoren më të mirë për Mikey Madison.

Ceremonia e këtij viti, e prezantuar për herë të parë nga Conan O’Brien, u zhvillua në sfondin e një sezoni të pazakontë çmimesh, i lënë në hije nga zjarret shkatërruese të janarit në Los Anxhelos, të cilat prekuan edhe industrinë e filmit.

Mbrëmja nisi me një montazh special filmash që i bënte homazh qytetit dhe përfundoi me këngën “We Love LA”, ndërsa një performancë emocionuese nga yjet e “Wicked”, Ariana Grande dhe Cynthia Erivo, ndezi atmosferën.

Pavarësisht sfidave, organizatorët kishin paralajmëruar më herët se ceremonia do të zhvillohej siç ishte planifikuar, ndonëse disa evente, si dreka vjetore e kandidatëve, u anuluan dhe afatet e nominimeve u rregulluan.

Ndër filmat më të nominuar, “Emilia Pérez” kryesoi me 13 nominime, ndërsa “Wicked” dhe “The Brutalist”, me Adrien Brody në rolin e një arkitekti të mbijetuar të Holokaustit, ndoqën me nga 10 nominime secili.

Në fund të natës, “The Brutalist” fitoi tre çmime, përfshirë Aktorin më të Mirë për Adrien Brody, ndërsa “Wicked” u vlerësua me dy trofe për Dizajnin më të Mirë të Prodhimit dhe Dizajnin më të Mirë të Kostumeve.

LEXONI GJITHASHTU:

• Netflix heq ‘Emilia Pérez’ nga fushata e Oscars pas postimeve nënçmuese
• Muzikali për bosin transgjinor të drogës kryeson nominimet për Oscar