Apple Maps ndryshon emrat e qyteteve të Kosovës

Aplikacioni Maps i Apple ka ndryshuar dhe rregulluar të gjitha emërtimet në territorin e Kosovës.

Të gjitha emrat e qyteteve dhe fshatrave në Kosovë, tashmë shënohen në gjuhen shqipe dhe jo në atë serbe siç ishin më parë.

Emrat, të cilat jo vetëm janë ndryshuar në shqip por edhe përmirësuar janë Prishtina – Prishtinë, Mitrovica – Mitrovicë, Peja – Pejë dhe qytete tjera.

Megjithatë ajo që vihet re është se emrat e disa lumenjve dhe liqeneve janë ende në gjuhën serbe.

Aplikacioni Apple Maps po punon që edhe këto emërtime të ndryshohen dhe të rregullohen në gjuhën shqipe.

Deri para verës së vitit 2020, Kosova nuk ishte shënuar në hartën e aplikacionit të Apple, por u vendos pas një peticioni online.

Gjithashtu edhe ndryshimi i emrave dhe fshatrave të Kosovës vjen pas një “presioni” të vazhdueshëm nga shqiptarët në rrjetet sociale dhe me anë të peticioneve të ndryshme.