Apple transportoi 600 tonë iPhone nga India në SHBA për shkak të tarifave të Trump 

Gjiganti amerikan i teknologjisë Apple punësoi fluturime mallrash për të transportuar gjithsej 600 tonë iPhone, ose deri në 1.5 milionë pajisje, nga India në Shtetet e Bashkuara, i nxitur nga dëshira për të “mposhtur” tarifat e shpallura nga presidenti amerikan Donald Trump.

Sipas burimeve anonime të Reuters, rreth gjashtë aeroplanë mallrash 100 tonësh që mbanin iPhone të Apple janë nisur nga India që nga marsi.

Pesha e ambalazhit të iPhone 14 dhe kabllos së tij të karikimit arrin në rreth 350 gram, sipas matjeve të agjencisë britanike, që lë të kuptohet se ngarkesa totale prej 600 tonësh përfshinte rreth 1.5 milionë iPhone.

Kompania ka lobuar tek autoritetet e aeroportit indian për të reduktuar kohën që duhet për të zhdoganuar në aeroportin Chennai në shtetin jugor indian të Tamil Nadu nga 30 në gjashtë orë, shtuan burimet.

Apple shpenzoi rreth tetë muaj duke planifikuar dhe vendosur zhdoganimin e përshpejtuar në Chennai dhe qeveria e kryeministrit Narendra Modi u ka kërkuar zyrtarëve të mbështesin firmën amerikane të teknologjisë me bazë në Cupertino, tha një zyrtar i lartë indian në kushte anonimiteti, sipas Economic Times.

Apple është shumë e ndjeshme ndaj konfliktit tregtar midis Uashingtonit dhe Pekinit, sepse një pjesë e konsiderueshme e prodhimit të saj ndodhet në Kinë, e cila përballet me tarifat amerikane prej 125 për qind.

Kompania gjithashtu ka prodhim në Indi, Vietnam dhe Tajlandë, por këto vende janë gjithashtu potencialisht nën tarifat reciproke të Trump, të cilat aktualisht janë pezulluar për 90 ditë.