Arrestimi i bosit të ‘Telegram’, francezët ngrenë akuzat; Moska: Akt politik

Themeluesi i “Telegram”, Pavel Durov u arrestua në kuadër të një hetimi të autoriteteve franceze për një seri shkeljesh të kryera nga rrjeti social, që variojnë nga qarkullimi i materialeve pornografike me të mitur, tek transaksionet ilegale dhe trafiku i narkotikëve.

Lajmin e bëri të ditur ditën e martë Prokuroria e Parisit, e cila gjithashtu njoftoi se gjendja e arrestit në dëm të Durov ishte zgjatur me 48 orë.

Ndaj miliarderit rus rëndojnë edhe akuzat e refuzimit të bashkëpunimit me autoritetet franceze, fshehjes së dokumenteve që do të ndikonin në zbardhjen e krimeve dhe ofrimit të shërbimit të kodifikimit të mesazheve për të mbrojtur shkelësit e ligjit, kryesisht trafikantë droge.

Por pavarësisht akuzave, rasti i Durov rrezikon të kthehet në një çështje politike. Në Moskë, shefi i Dumës ruse, Vjaçesllav Volodin ka deklaruar se prapa arrestimit të tij qëndrojnë Shtetet e Bashkuara.

Në të njëjtën linjë është shprehur edhe një zyrtar i lartë i shërbimeve sekrete ruse, sipas të cilit administratës së presidentit Biden i intereson të marrë nën kontroll rrjetin “Telegram”.

Duke reaguar, Kremlini ka deklaruar se Durov nuk  do t’u japë informacione agjencive perëndimore të inteligjencës. “Pa prova konkrete, arrestimi i tij është një akt politik”, ka deklaruar zyra e shtypit.

Të hënën, presidenti Emmanuel Macron mohoi që arrestimi të kishte ngjyrime politike. “Arrestimi u bë në kuadër të një hetimi të autoriteteve gjyqësore dhe në asnjë mënyrë nuk ishte një vendim politik”, deklaroi Macron, duke shtuar se u takonte gjyqtarëve të vendosnin mbi çështjen.

Ndërsa drejtuesit e rrjetit “Telegram”, në një reagim i quajtën “absurde” pretendimet se platforma ishte përgjegjëse për krimet e rënda që i atribuohen.