Arrestohen 2 zjarrfikës në Francës për zjarret shkatërruese

Brenda pak ditësh, policia në Francë ka arrestuar dy zjarrfikës vullnetarë të akuzuar për vënien e disa prej zjarreve më shkatërruese që kanë përfshirë vendin këtë verë.

Njëri prej tyre është një 27-vjeçar, i akuzuar për djegien e 230 hektarëve në lindje të Francës. Kolegët e tij shprehen të zhgënjyer.

“Veprimi i tij njollos uniformën. S’mund të ketë tolerancë ndaj tij”, u shpreh zjarrfikësi Cyril Fournier.

Në Grenobël, një tjetër vullnetar ndodhet në burg që prej së enjtes. Ai dyshohet për një seri zjarresh të rëna në qytetin Vif. Ndërsa në fund të korrikut, në rajonin Herault, një rojtar pyjesh pranoi personalisht se kishte qenë autor i disa zjarrvënieve.

“Sa i takon zjarreve kemi elementë të ndryshëm që sugjerojnë një pistë kriminale, sidomos kur disa zjarre bien njëkohësisht”, tha Christophe Peigne, oficer policie.

Që nga nisja e verës, 34 zjarrvënës janë arrestuar në Francë, sipas të dhënave të Ministrisë së Brendshme.

LEXONI GJITHASHTU:

• Rusia do të ndërtojë dy reaktorë bërthamorë në Hungari
• Skandali i përgjimeve greke, qeveria helene mohon përgjegjësinë