Arrestohen spiunët rusë në Gjermani, planifikonin akte sabotazhi ndaj ushtrisë

Dy të dyshuar për spiunazh, që po komplotonin për të sabotuar ndihmën ushtarake gjermane për Ukrainën, janë arrestuar në landin gjerman të Bavarisë.

Dy personat, me shtetësi të dyfishtë gjermane dhe ruse, u ndaluan në lokalitetin Bajrojth, nën dyshimin se spiunonin për Rusinë – deklaruan prokurorët gjermanë.

Ndaj njërit prej tyre, 39 vjeç, rëndojnë një sërë akuzash si planifikim për vendosje eksplozivi, zjarrëvenie dhe mbajtjen e kontakteve me inteligjencën ruse.

Ai akuzohet gjithashtu se ka luftuar për llogari të forcave të armatosura ruse në lindjen e pushtuar të Ukrainës.

Ndërsa i dyshuari i dytë akuzohet për dhënie ndihme në identifikimin e objektivave për të sulmuar.

Gjermania është donatori i dytë më i madh i ndihmave ushtarake për Ukrainën pas Shteteve të Bashkuara, me 28 miliardë që nga fillimi i pushtimit në shkurt të 2022-shit.

Sipas prokurorëve, i dyshuari kryesor akuzohet se ka diskutuar kryerjen e operacioneve të sabotimit në Gjermani bashkë me kontaktin e tij rus që prej tetorit të vitit të kaluar.

Ai thuhet se kishte zgjedhur me kujdes objektivat e tij, përfshirë komplekse ushtarake amerikane, duke bërë foto dhe video dhe duke ia dorëzuar ato kontaktit rus.

Ministri gjerman i Drejtësisë, Marco Buschmann tha për mediat se dy arrestimet ishin një tjetër sukses i rëndësishëm hetimor në luftën kundër rrjeteve të spiunazhit të presidentit Putin.

LEXONI GJITHASHTU:

• Vulin: Spiunë të CIA-s brenda qeverisë së Vuçiç!
• Vulin provokon Perëndimin: Bota Serbe nuk ndalet, pavarësisht sanksioneve