“Arti i Luftës”, ekspozitë me vizatime e fotografi nga dëshmorët e luftës

Qendra Kombëtare e Librit dhe Leximit çeli të hënën një ekspozitë me vepra të realizuara nga dëshmorët e Luftës Nacional-Çlirimtare. Ekspozita titullohet “Arti i Luftës” dhe ka në përmbajtjen e saj vizatime dhe fotografi.

Mbi 300 vizatime që tregojnë kulturën e madhe të figurave qendrore të Luftës Nacional-Çlirimtare, vijnë nën kujdesin e Mehmet Gëzhillit. Të pranishëm në hapjen e ekspozitës ishin ish-presidenti Alfred Moisiu, historianë dhe veteranë, të cilët evokuan kohën e luftës për çlirim të viteve 1939 – 1944 dhe heronjtë e saj.

Në këtë event u prezantua edhe libri “Ju kish rritur nëna për një botë të re” me autor Mehmet Gëzhillin, me krijime poetike nga autorë të ndryshëm, kushtuar dëshmorëve dhe heronjve të luftës.

Ekspozita vjen në hapësirat e QKLL, në kuadër të 80-vjetorit të Çlirimit ndërsa do të qëndrojë e hapur për publikun, duke iu shtuar axhendës së ngjeshur të aktiviteteve të parashikuara edhe në kuadër të Javës Kulturore Kombëtare.

LEXONI GJITHASHTU:

• Java Kulturore Amerikane, stilistja amerikane sjellë veshjet e ricikluara në Tiranë
• “Nga toka në tryezë”, panairi agroturistik-kulturor në Përrenjas me produkte bio