Shpejtësia me të cilën është përmbysur status quo-ja në Siri ditët e fundit ka qenë e jashtëzakonshme, duke thelluar pasigurinë në terren.

Fillimisht, zyrtarët dhe mbështetësit e qeverisë siriane deklaruan me bindje se ushtria do të ruante pozicionet në Hama, pavarësisht se luftëtarët kryengritës po afroheshin në qytet. Por shumë shpejt, situata ndryshoi. Ushtria siriane konfirmoi tërheqjen e saj, duke ia lënë për herë të parë kontrollin e qytetit fraksioneve rebele.

Brenda një jave, kryengritësit, të udhëhequr nga grupi islamik Hayat Tahrir al-Sham (HTS), pushtuan dy qytete të mëdha, përfshirë Alepon dhe Haman. Tani, objektivi i tyre i radhës duket se është Homs, një qytet me rëndësi strategjike të jashtëzakonshme.

Dhjetëra mijëra banorë janë larguar nga Homs në pritje të një beteje të madhe që duket e pashmangshme.

Për presidentin Bashar al-Assad dhe aleatët e tij kryesorë, Rusinë dhe Iranin, situata është alarmante. Homs ka një rëndësi strategjike të veçantë: ndodhet në një udhëkryq që lidh rajonet perëndimore, ku Assad ka mbështetjen më të fortë. Humbja e këtij qyteti do të ishte një goditje e rëndë për regjimin dhe për aleatët e tij ndërkombëtarë, pasi do të bënte që rebelët të drejtoheshin për Damask.

LEXONI GJITHASHTU:

• Guterres bën thirrje për ndaljen e luftimeve në Siri
• Ushtria siriane tërhiqet nga qyteti Hama pas përparimit të rebelëve