Ashpërsohen luftimet në Gaza, Izraeli sulmon edhe Libanin

Izraeli ka deklaruar se i është përgjigjur me artileri infrastrukturës së Hezbollah pas sulmeve ndërkufitare nga Libani. Forcat Mbrojtëse Izraelite mbeten në gatishmëri të lartë për një përshkallëzim të mundshëm të konfliktit, pasi një nga liderët e Hamasit u vra në Beirut.

Vdekja e Saleh Al Aruri, eksponenti më i vjetër i Hamasit që vritet që nga fillimi i konfliktit në Gaza rreth 3 muaj më parë, i është atribuuar Izraelit, edhe pse pa asnjë provë.

24 orë pas sulmit, kreu i lëvizjes Hezbollah, Hasan Nasrallah deklaroi se shteti hebre duhet të presë një “përgjigje dhe ndëshkim të fortë” dhe paralajmëroi se, në rast se armiku mendon ta shtrijë luftën në Liban do të paguajë një çmim të lartë.

Ndërkohë, trupat izraelite në Rripin e Gazës janë riorganizuar duke u grumbulluar në jug të Izraelit, teksa luftimet u ashpërsuan ndjeshëm në qendër dhe jug të Gazës. Sulmi nga deti, toka dhe ajri i Izraelit në Gaza ka marrë mbi 22 mijë e 300 jetë njerëzish, sipas autoriteteve palestineze.

Luftime intensive janë regjistruar edhe përreth qytetit Khan Junis, në jug të Gazës. Izraeli deklaroi se një avion i forcave ajrore goditi një kompleks ku prodhoheshin armët për Xhihadin Islamik.

Ndërsa OKB ka denoncuar se 5 persona u vranë në një sulm ndaj godinës së Gjysmë Hënës së Kuqe në këtë qytet, teksa shteti hebre ka përsëritur thirrjen për evakuimin e tij. Mes viktimave është edhe një fëmijë 5-ditësh. 

LEXONI GJITHASHTU: 

• E propozoi Biden, Senati i SHBA refuzon David Kostelancik si ambasador në Shqipëri
• Talibanët arrestojnë gratë për mbajtjen e “hixhabit të keq”