Astronautja “Barbie” udhëton në zero gravitet, frymëzim për vajzat

Një kukull Barbie që duket si astronautia italiane Samantha Cristoforetti është dërguar në një fluturim me gravitet zero.

Agjencia Evropiane e Hapësirës (ESA) dhe kompania e lodrave Mattel krijuan këtë kukull me qëllim për të inkurajuar vajzat të bëhen gjenerata e ardhshme e astronautëve, inxhinierëve dhe shkencëtarëve të hapësirës.

Gjithashtu kjo nismë është bërë në kuadër të Javës Botërore të Hapësirës që organizohet nga 4 deri në 10 Tetor.

“Si astronautë, ne jemi të interesuar që të frymëzojmë brezin e ardhshëm, të frymëzojmë djemtë dhe vajzat e reja që duan të fillojnë karrierën në eksplorimin e hapësirës, shkencë ose teknologji. Kjo javë i dedikohet posaçërisht frymëzimit të grave për të vazhduar karrierën në hapësirë”  tha Astronautia italiane Samantha Cristoforetti.

Si pjesë e projektit, kukulla tregoi përgatitjen që duhet të bëjë një astronaut përpara se të niset në hapësirë, duke u nisur në një fluturim me gravitet zero nga një bazë e Agjensisë Evropiane të Hapësirës në Gjermani.

Një pjesë e të ardhurave nga shitjet e kukullës në Evropë do të shkojnë për organizatën jofitimprurëse “Gratë në Evropën Hapësinore”.