“Aty ku dielli prek detin”, Himara hap sezonin turistik me koncerte dhe evente

Himara çel zyrtarisht sezonin turistik me një program të larmishëm aktivitetesh që do të zhvillohen në datat 1, 2 dhe 3 maj.

Aktivitetet do të përfshijnë evente kulturore, sportive, argëtuese dhe muzikore, me pjesëmarrjen e artistëve dhe grupeve të ndryshme.

Në ditën e parë parashikohen parada e Bandës Filarmonike, regjistrimet për beach volley, mini maratona “Himara RunFest”, ekspozita fotografike dhe dokumentare, panairi i artizanatit dhe kulinarisë, si dhe koncert folklorik me pjesëmarrjen e Grupit të Himarës, Arvi Mene, Landi Cenko, Maya dhe Devis Xherahu.

Më 2 maj, programi vijon me aktivitete për fëmijë, karnaval veror, scuba diving, aktivitete me kajak, festival dritash, kinema të hapur dhe koncert me Ronela Hajatin dhe Elita 5.

Në ditën e tretë, aktivitetet përfshijnë ekspozita, cirk, panair artizanati, jet ski, “Drone Show” dhe koncert me Kostandinos Argiros.

Aktivitetet zhvillohen nën moton “Aty ku dielli prek detin”, si pjesë e promovimit të Himarës për sezonin e ri turistik.